மூவேந்தர் யார்? பகுதி-40

மள்ளரிய தந்தை 

இரா. தேவ ஆசிர்வாதம் 

முன்னாள் டிப்டி கலெக்டர்

பாண்டியன்:

நெல்லை மாவட்டம் செங்கோட்டைப் பகுதி வாழ்தேவேந்திர குலத்தார் பாண்டியன் என்ற குலப் பட்டம் பூண்டு வருகின்றனர். சுமார். 70 - 80 ஆண்டுகளுக்கு முன், செங்கோட்டைப் பகுதிவாழ் மறவர் பாண்டியர் என்ற பட்டம் தங்களுக்கே உரியது என்றும், தேவேந்திர குலத்தார் அதைத் தரிக்கக்கூடாது என்றும், அன்றையத் திருவனந்தபுரம் உயர் நீதி மன்றத்தில் வழக்குத் தொடர்ந்தனர் என்றும், அவ்வழக்கை விசாரித்த உயர்நீதிமன்றம், பாண்டியன் என்ற பட்டம் தேவேந்திர குலத்தாருக்கே உரியது என்றும், அது மறவருக்கு உரியதல்ல என்றும் தீர்ப்பு வழங்கியதாக இப்பகுதிவாழ் தேவேந்திரகுலத்தார் கூறுகின்றனர். இவர் கைவசமுள்ள கிரையம், ஒத்திப்பத்திரங்களில் தம்மைப்பாண்டியன் என்றே பதிந்து வருகின்றனர். இப்பட்டத்தை மறவரும், சாணார் என்ற நாடாரும் தரித்து வருவதுடன், தாங்கள்தான் பாண்டிய மன்னர் பரம்பரை என்று கூறிவருகின்றனர். (மோசஸ் பொன்னையா - நாடார் வரலாறு. முத்துதேவர் – முக்குலத்தோர் - மூவேந்தர்) (குறிப்பு: இந்த இரு மரபினருள் பெரும்பாலோரின் தாயகம் தமிழகம் இல்லை. இவருள் பல பிரிவுகள் உண்டு. சிலபிரிவுகள் தமிழகத்தின் பழங்குடியினராய் இருக்கலாம். ஆனால் பெரும்பாலான பிரிவுகள், வேற்றிடங்களிலிருந்து இடைக் காலத்தில் தமிழகத்தில் குடியேறியவர் என்றே கருத வேண்டியுள்ளது. இவரது உடற்கட்டு, தோற்றம், பேச்சு பழக்கவழக்கம் இவைகள், மற்றப் பெரும்பாலான தமிழ் மரபினருடையவற்றிலிருந்து வேறுபடுவது இதற்குச் சான்றாக அமையும்.

பாண்டிய நாட்டிலுள்ள தேவேந்திரகுலத்தார் அனைவரும் பாண்டியன் பட்டம் தரிக்காமல், செங்கோட்டைப் பகுதிவாழ் இம்மரபினர் மட்டும், அதைத் தரித்து வருவது பாண்டிய நாட்டில் சில நூற்றாண்டுகளாய் மறவர் ஆதிக்கம் மேலோங்கியிருந்து வந்ததினாலேயாம். இங்கு பெரும் எண்ணிக்கையிலான பாளையப் பட்டுகள் இராமநாதபுரம் சேதுபதி, சிவகங்கை குறுநிலமன்னர் மற்றும், அவரது ஆளுகையின் கீழ் உள்ள மறவர், பாண்டியன் என்ற பட்டத்தைத்தரிக்க முற்பட்டதால் தேவேந்திர குலத்தார் குடும்பன் என்ற பட்டத்தையே மேற்கொள்ளலாயினர் எனலாம். எனினும் இவருள் சிலர் தங்கள், இயற்பெயர்களுடன் பாண்டி, பாண்டியன் என்பதைச் சேர்த்து வழங்கி வருவது கண்கூடு. இம்மரபுப் பெண்களில் கூடச் சிலர் பாண்டி, பாண்டியம்மாள் என்ற பெயர்களைக் கொண்டுள்ளனர். பாண்டிய நாட்டிலுள்ள பாணர் மேஸ்திரி என்போர் தங்களைப் பாண்டிய குலவேளாளர் என்பர். மற்றும் பாண்டிய நாட்டிலுள்ள பூர்வீக வண்ணார், நாவிதர், கம்மாளர், ஒச்சர், குயவர் இவர்கள் முறையே தங்களைப் பாண்டிய வண்ணார், பாண்டியநாவிதர், பாண்டியக் கம்மாளர், பாண்டிய ஒச்சர் பாண்டியகுலாலர் என்று கூறுவது வழக்கமாய் இருந்து வருகின்றது. இவ்வாறு இவர்கள் கூறிவருவது தாம், பாண்டிய நாட்டின் பூர்வீகக் குடியினர் என்பதை உணர்த்துவதாய் உள்ளது.

மூப்பன் : -

சோழ நாட்டில் திருச்சி மாவட்டத்திலும், தஞ்சை மாவட்டத்தின். மேல் பகுதியிலும், சேலம் மாவட்டம் ராசிபுரம் பகுதியிலுமுள்ள தேவேந்திர குலத்தார் மூப்பன் என்ற பட்டம் பூண்டு வருகின்றனர். தேவேந்திர குலத்தாரைத் தவிர, கொங்கு நாட்டில் சாணாருள் ஒரு சாராரும், மதுரை மாவட்டத்தின் மேற்குப் பகுதியில் வலையரும் முப்பன் என்ற பட்டம் தரித்துவருகின்றனர். இவர் தவிர தஞ்சாவூர் மாவட்டத்தில், தஞ்சாவூர், பாபநாசம் தாலுக்காக்களிலும், திருச்சி மாவட்டம் உடையார் பாளையம் தாலுக்காவிலுமுள்ள சுருதிமான் வகுப்பார் அண்மைக்காலம் வரை மூப்பன் என வழங்கினர். இவருள் பொருளாதாரத்தில் முன்னேறியவர் அதை இழி சொல்லாகக் கருதி, மூப்பனார் என்று அழைக்க முற்பட்டுள்ளனர். இவரைப்பின்பற்றி இவ்வகுப்பைச் சேர்ந்த அனைவரும். மூப்பனார் என்று அழைக்க ஆரம்பித்துள்ளனர். எனினும் மற்ற வகுப்பார், பொருளாதாரத்தில் கீழ்நிலையில் உள்ள இம்மரபினரை. மூப்பன் என்றே தொடர்ந்து அழைத்து வருகின்றனர். மூப்பனார் என்ற சொல்லுக்குப் பொருள் இல்லை. மூப்பன் எனில் வயதில் மூத்தவன், ஊர்த்தலைவன் என்று பொருள்படும். திருச்சி மாவட்டத்தில் தேவேந்திர குலத்தார் வேளாண்மைத் தொழிலுக்கு வேலையாட்கள் சேர்த்து வேலை வாங்குபவரை மூப்பன் என அழைப்பதுண்டு. இம்மாவட்டம் முசிறி தாலுக்கா அரசலூர் கிராமக் கல்வெட்டு ஒன்றில் “பள்ள மாணிக்க மூப்பன்” (தென் இந்திய கோயில் சாசனங்கள் பாகம் I. எண் 796) என்று பொறிக்கப்பட்டுள்ளது காண்க, ஊர்சபைகளுக்கு புள்ளி மூப்பன், நாட்டு மூப்பன் என்ற சமூகத் தலைவர்கள் இவர் மத்தியில் இருந்து வருகின்றனர். ஊர் சமூகப் பஞ்சாயத்துத் தலைவர் மூப்பன் என்றே வழங்கி வருகின்றனர். ஊர் சமூகப் பஞ்சாயத்துத் தலைவரை மூப்பன் என்று வழங்கும் பழக்கத்தை ஒட்டி இப்பகுதிவாழ் தேவேந்திர குலத்தார் அனைவரும் மூப்பன் என்பதைக் குலப்பட்டமாகப் பூண்டு வருகின்றனர் எனலாம்.

பணிக்கன்.

தஞ்சை மாவட்டம், தஞ்சாவூர், பாபநாசம் தாலுக்காகளில் தேவேந்திரகுலத்தாருள் ஒருசாரார் பணிக்கன் என்ற குலப்பட்டம் தாங்கி வருகின்றனர். பணிக்கன் என்பது படைக்கலம் பயிற்றுவோன் என்ற பொருளில் இவருக்கு வழங்கி வருவதாகக் கருதற்பாலது. சென்னை பல்கலைக் கழக அகராதியில் பணிக்கன் என்ற சொல்லுக்கு ஆசிரியர், படைக்கலம் பயிற்றுவோன், கூத்து பயில்விப்போன் தலைமைக் கொற்றன், தச்சன், யானைப்பாகன், நாவிதர் தலைவன் விஷவைத்தியன், சாராயம் காய்ச்சுவோன், பள்ளர் சாதியில் ஒருவகுப்பு எனப் பொருள் கண்டுள்ளது. கேரளாவில் போர்ப்பயிற்சி செய்பவன், தேகப்பயிற்சி கற்பிக்கும் ஆசிரியன் இவர்கள் பணிக்கன் என வழங்கி வருகின்றனர். ஈழவர், இலை வாணியர் இவருள் ஒரு சாரார் பணிக்கன் என்ற குலப்பட்டம் பூண்டு வருகின்றனர்."

தொண்டைமான்:

திருச்சி மாவட்டத்தில் தேவேந்திரகுலத்தாருள் ஒரு பிரிவினர் தொண்டைமான் என்ற குலப்பட்டம் பூண்டு வருகின்றனர். கள்ளர், பள்ளி (படையாட்சி) ஏன்? கொங்கு வேளாளர் என வழங்கிவரும் கவுண்டருள் சிலரும் தொண்டைமான் என்ற குலப்பட்டம் தரித்து வருகின்றனர். சங்ககாலத்தில், சோழரின் கீழ் இருந்த இளந்திரையன் தொண்டைமான் என்ற பட்டத்தைத் தரித்திருந்தான். பின்னர் இடைக்காலச் சோழர் ஆட்சியில், கலிங்கப் போரைத் தலைமை தாங்கி நடத்திய படைத்தலைவன் கருணாகரன் தொண்டைமான் என்ற பட்டம் பூண்டிருந்தான். இவனைப் பல்லவ இளவரசன் என்பர். சோழர் காலக் கல்வெட்டில் சோழ வளநாட்டு திருநறையூர் நாட்டு வண்டாழஞ் சேரியுடையான் வேளான் கருணாகரத் தொண்டைமானார் (SII.Vol. IV. -862) என்று பொறிக்கப்பட்டுள்ளது.

புதுக்கோட்டை மன்னர் வடுகர் இனத்தைச் சேர்ந்தவர், இவர் தொண்டைமான் என்ற பட்டம் தாங்கி வந்தனர் என்பதுவும் ஈண்டு குறிப்பிடத்தக்கது. புதுக்கோட்டைத் தொண்டைமான் கீழிருந்து பணிபுரிந்த கள்ளருள் சிலர் தொண்டைமான் என்ற குலப்பட்டம் பூண்டதால் புதுக்கோட்டைத் தொண்டைமான் கள்ளர் இனத்தைச் சேர்ந்தவர் என்ற தவறான கருத்து நாட்டில் நிலவுகின்றது. இவ்வாசிரியரும் ஏற்கனவே இவரைக் கள்ளர் என்றே எழுதிவந்திருக்கின்றார் என்பது குறிப்பிடத்தக்கது. இந்தப் புதுக்கோட்டை அரசைத்தோற்றுவித்தவர் தொண்டைமண்டலப் பகுதியிலிருந்து இங்கு இடைக்காலத்தில் குடியேயேறியவர் ஆவர்.

தொண்டைமண்டலத்திலிருந்து வந்ததால் தொண்டைமான் என்ற பட்டத்தைப் பூண்டனர் என வரலாற்றறிஞர் கூறுவர். இவர் தொண்டைமான், இளந்திரையன் மற்றம் கருணாகரன் தொண்டைமான் வழித் தோன்றல் என்பதற்கு எவ்விதச் சான்றும் இல்லை. தொண்டைமான் இளந்திரையன் மள்ளர் குடியைச் சேர்ந்தவன் என்பது நாம் அறிந்ததுவே. கருணாகரத் தொண்டைமான் வேளாளன் என்று கல்வெட்டு கூறுவதால் அவன் தேவேந்திர குலத்தைச் சேர்ந்தவனே ஆவன். திருச்சி மாவட்டத்தில் தொண்டைமான் என்ற பட்டம் தரித்துவரும் தேவேந்திரகுலத்தார் ஏற்கனவே தொண்டை மண்டலப் பகுதியில் வாழ்ந்து அப்பகுதி வேற்று நாட்டினரால் ஆக்கிரமிக்கப்பட்டபோது, அங்கிருந்து தெற்கே குடிபோந்தவரின் வழித் தோன்றல்கள் என்றே நாம் கருத வேண்டியுள்ளது. செங்கற்பட்டு மாவட்டக் குறிப்பில், தேவேந்திர குலத்தார் அங்கு அதிக எண்ணிக்கையில் இருப்பதாகக் கண்டுள்ளது. ஆனால் அந்த மாவட்டக் குறிப்பு தயாரித்த பின்னர், எடுக்கப்பட்ட மக்கள் குடிக்கணக்கில் இவரது எண்ணிக்கை மிகவும் குறைந்துள்ளது. இதற்குக்காரணம் ஆங்கிருந்த, தேவேந்திர குலத்தாருள் ஒரு சாரார் இடையே வெளி இடங்களுக்குச் சென்றிருக்கவேண்டும்; மற்றும் இன்னொரு சாரார் பள்ளி (படையாச்சி - வன்னியர்) வகுப்பாருடன் கலந்திருக்கவேண்டும். (பள்ளர் பெண்பால் பெயர் - பள்ளியும், பள்ளி மரபுப் பெயரும் ஒன்றாய் இருப்பதால் இவ்விணைப்பு சாத்தியமே ஆகும்) பள்ளி வகுப்பில் இந்திர குலத்தார் என்ற ஒரு உட்பிரிவு இருந்து வருகின்றது. இவர் தேவேந்திர குலத்தைச் சேர்ந்தவரா? என்பது ஆய்வுக்குரிய ஒன்றாகும்.

(தொடரும்)