மூவேந்தர் யார்? பகுதி-12

மள்ளரிய தந்தை 

இரா.தேவ ஆசிர்வாதம் 

முன்னாள் டிப்டி கலெக்டர்

6) J.H. நெல்சன் கூறுவதாவது :- இந்துக்களின் சில குறிப்புகளிலிருந்து பாண்டியர் அயோத்தியிலிருந்து வந்தவர் எனத் தெரிகிறது. ஆனால் இதைச் செவிவழிச் செய்தியாகக் கொள்வதற்கில்லை. பாண்டியர் திங்கள் மரபைச் சேர்ந்த சத்திரியர் எனப் பொதுவாக நம்பப்படுகிறது. அதனால் இவர் வெள்ளாளர் அல்லது வேளாளரோ அல்ல.(J.H. Nelson. Madura Manual. Page 44].

7) மெக்கன்சி கைப்பிரதிகளில் கண்டிருப்பதாவது:

"வடதேசத்திலுள்ள பண்டியனாகிய வெள்ளாளனிந்த இராமேசுர யாத்திரைக்குப் புறப்பட்டு வந்தான். இப்படியான அரசன் பாண்டியன் பெயர் மதுரநாயகப்பாண்டியன். அவன் முதலுண்டு பண்ணின பட்டணத்துக்குத் தன் பேரைத் தானே வைத்து மதுராபுரியென்றும், மதுரை நகரென்றும் பேரிட்டு பின்னுமனேக பட்டணங்களை உண்டு பண்ணினான். சோழ அரசை ஏற்படுத்தியவன் தேய்மான் நள்ளியும் ஒரு வெள்ளாளன் எனப்பட்டான். [William Mackenzie Collections. Tamil Local History No. 4. William Taylor Vol III G. Oppert. The original inhabitants of India. pages 102 & 103.]

8) PT. சீனிவாச அய்யங்கார் கூறுவதாவது : சோழர் காவிரிப் பள்ளத்தாக்கில் வேளாண்மைத் தொழிலில் ஈடுபட்டு வந்த வேளாளர். சேரர் குறிஞ்சி நிலவாழ் குறவர், பாண்டியர் நெய்தல் நில வாழ் பரதவர் ஆவர்.

(PT. Srinivasa Iyangar says : "The Cholas were agricultural tribes (Vellalas) who lived in the Valley of Kaveri and had the athi. The Cheras are Koravas of the Kurinji region. The Pandyas were the coast people - Paradavar (P.T Srinivasa Iyangan History of the Tamils from the earliest times to 600 AD. Page 139),

9 V.R இராமச்சந்திரதீட்சதர் கூறுவதாவது: தமிழ் அரசுகள் முல்லை நிலத்தில் வாழ்ந்த மக்கள் குழுவிலிருந்து தோன்றியவை என நன்கு புலப்படுகின்றது. மன்னர் தரித்திருந்த பட்டங்களுள் கோ அல்லது கோன் என்பதுவும் ஒன்று. இப்பட்டத்தை ஆயரும் பூண்டிருந்தனர். ஆயருக்குக் கால்நடைகள்தான் உடைமையாய் இருந்தன. அதைத்தான்

அவர்கள் தங்களின் வழி வந்தோருக்குப் பகிர்ந்தளித்தனர். பண்டைக் காலத்தில் மக்களுக்கு உடைமையாய் இருந்தவற்றில் கால் நடைகளும் ஒன்று என்பது நாம் அறிந்ததே. ஆதனால் கோன் என்பது கால் நடைகளை உடைமையாகக் கொண்டிருந்த தலைவனைச் சுட்டும். ஆயர் மரபிலிருந்து பாண்டியர் மரபுதோன்றியது என்பது

"வாடாச்சீர்த தென்னவன் 

தொல் இசை நட்ட குடியோடு தோன்றிய 

நல்லினத்தாயர் “ (கலி 104; 4 - 6)

“அரைசுபடக் கடந்து அட்டு ஆற்றின்தந்த

………………………………………………………………………………………….

வீவு இல் குடிப்பின் இருங்குடி ஆயரும்" (கலி 105; 1 – 7)

என்ற மேற்கோளிலிருந்து அறியப்படுகிறது. இதே நிலைதான் மருத நிலத்தில் அரசன் உருவானதற்கு வேளாண்மைத் தொழில் அடிப்படையாய் அமைந்து, மக்களின் உயிர்நாடியாகவும் மட்டுமின்றி, அது சமூக மேம்பாட்டிற்கு இன்றியமையாததாகவும் இருந்து வந்தது.'

(V.R. Ramachandra Ditchadar. Studies of the Tamil literature and History. Pages 178 & 179.) :

10) A.C. பர்னல் கூறுவதாவது: பாண்டியரும் சோழரும் இன்று கீழ் சாதியாகக் கருதப்படும் கள்ளர் அல்லது திருடர் மரபைச் சேர்ந்தவர் ஆவார். [The Cholas and Pandyas were merely Kallar or robber a low caste at the Present time.] [A.C. Burnel, Elements of South Indian Paleography. Page36]

11) ந.மு. வெங்கடசாமி நாட்டார் கூறுவதாவது: அகநானூற்றில் கள்வர் பெருமகன் தென்னவன் என மதுரைக்கணக்காயனார் எனும் புலவர் ஒரு பாண்டியனைப் பற்றிக் குறித்துள்ளார். இவற்றால் சங்க காலத்தில் கள்வர் குலத்தவர் அரசராயிருந்தனர் என்று தெரிகிறது. விசயாலயன் எனும் சோழ அரசன் தஞ்சையைப் பிடித்து சோழ ஆட்சியை நிலைநிறுத்துவதற்கு முன் முத்தரையர் ஆண்டனர். முத்தரையர் கள்ளர். முத்திரியர் வேறு. செந்தலைக் கல்வெட்டில் தஞ்சைக்கோன் கள்வர் கள்வன் பெரும்பிடுகு முத்தரையன் என்று கண்டிருக்கிறது. வல்லத்தரசு தஞ்சைராயர், செம்பிய முத்தரையர் என்னும் பட்டமுள்ள கள்ளர் குல்த்தவர் தஞ்சையைச் சூழ்ந்த இடங்களில் இருக்கின்றனர். கி.பி. 7 - 8 ஆம் நூற்றாண்டுகளில் பலம் பெற்ற கள்வர் மரபினர் குறுநில மன்னராயிருந்தனர் என்று அகநானூற்றில் காணப்படும் 'கோமான் புல்லி’, ‘கள்வர் கோமான் தென்னவன்' என்னும் மேற்கோள்களால் அறியலாம். பர்னலும், வெங்கிடசாமிராவும் சோழர் கள்ளர், பாண்டியர், மறவர் என்று கூறுவர். கனகசபை பிள்ளை சேர, சோழ, பாண்டியர் வெள்ளாள மரபினர் என்று கூறுவது தவறு. (ந.மு. வெங்கடசாமி. நாட்டார். கள்ளர் சரித்திரம். பக். 17).

இந்திரன் அகலிகை பால் விருப்பம் கொண்டதையறிந்த இந்திராணி தன் சாயலாய் அகலிகை போலும் அழகுடைய மோகனாங்கி என்பவளைப் படைத்திட இந்திரன் அவளைச் சேர்ந்து கள்ளர், மறவர். அகம்படியர் என்னும் பூவிந்திரர் மூவரைப் பெற்றாளென்றும், அவர்கள் தமிழ்நாடு மூன்றுக்கும் அரசராயினர் என்றும் அப்புராணங்கள் (பூவிந்திரபுராணம், கள்ளகேசரி புராணம்) கூறும். இவையும் இந்திரகுலம் என்னும் பெயர் வழக்கிலிருந்து தோன்றியவை என்பது கூறவேண்டியதில்லை. இவைகளிலிருந்து கள்ளர், மறவர், அகம்படியர் என்னும் மூன்று வகுப்பினரும் நெருங்கிய சம்பந்தமுடையவராய் இந்திர குலத்தினரென வழங்கப்பெற்று வந்திருக்கின்றனர் என்ற அளவு உண்மையெனக் கொள்ளலாம்.

இனி ஏறக்குறைய ஆயிரத்தெண்னூறு ஆண்டுகளுக்கு முன்பே இந்திரகுலம் என்னும் வழக்குண்மை வெளியாகின்றது. சாவக நாட்டிலே நாகபுரத்தில் இருந்து அரசு புரிந்த பூமி சந்திரன், புண்ணியராசன் என்னும் நாக அரசர்களை இந்திர குலத்தவர் என மணிமேகலை கூறுகின்றது. சூரிய சந்திர வம்சங்களைக் காட்டுவதற்கும் மணிமேகலையிலும் பழமையான சான்று தமிழில் இல்லை. இங்ஙனம் மிகப்பழமையான நாளிலே இந்திரகுலத்தினரெனப்பட்ட நாகரது வழியிலே அல்லது நாகராயப்பல்லவர் வழியிலே வந்தமையால் கள்ளர்கள் இந்திரகுலத்தின ரென்று வழங்கப்பட்டனராதல் வேண்டும். அன்றி சோழர்களை இந்திரன் வழியினரென்பது ஒரு சாரார் கொள்கை. இந்திரன் ஆரியர் வழிபட்ட கடவுள் என வடமொழி நூல்களில் பெறப்படுமேனும் தமிழரது தெய்வம் என்று சிலர் கருதுகின்றனர். சோழர் தம் குல முதல்வனாகிய வேந்தனைத் தெய்வமாகிக்கொண்டு வழிபட்டன ரென்றும் கூறுவர். பழைய நாளில் சோழர் இந்திரனுக்குப் பெருஞ் சிறப்புடன் திருவிழாச் செய்து போந்தமை சிலப்பதிகாரம் முதலியவற்றால் வெளிப்படை. சாரதிராசன் முதலாவது சோழன் எனக் கலிங்கத்துப் பரணி கூறுகின்றது. இவற்றிலிருந்து சோழர் இந்திர குலத்தாரென்பது பெறப்படு மேல் அவர் வழியினராகிய கள்ளர் இந்திர குலத்தினர் எனப்படுவது அதனாலே அமையும். தேவர் எனும், பெயர் இராசராசதேவர், இராசேந்திர தேவர், குலோத்துங்கச் சோழ தேவர் எனச் சோழ மன்னருக்கு வழங்கியிருப்பதுவும் கள்ளர். மறவர், அகம்படியர் என்னும் இவ்வகுப்பாரும் தேவர் என வழங்கப்படுவதும் இங்கு அறியற்பாலது. ந.மு. வெங்கடசாமி நாட்டார். கள்ளர் சரித்திரம். மூன்றாம் பதிப்பு. பக். 43 - 44).

12) டாக்டர் K.K. பிள்ளை கூறுவதாவது: தென் மாவட்டங்களில் மறவர் அதிக எண்ணிக்கையில் உள்ளனர். பாண்டிய அரசில் அவர் செல்வாக்குப் பெற்றிருந்தனர் எனத் தெரிகிறது. உண்மையில் பாண்டியர் மறவர் என்றே நம்பப்படுகிறது.

Dr. K.K. Pillai says : "The maravas are found in the largest number in the southern districts. In the political sphere they seem to have weilded considerable influence under the Pandyas. Infact the Pandyas are believed to have themselves belonged to the Marava. Castes' [Dr. K.K. Pillai. Studies in Indian History with special reference to Tamil Nadu. Page, 332]

13) இராமலிங்க குருக்கள், குமரய்யர் நாடார் இருவரும் கூறுவதாவது: சாணார் என்பது சான்றோர் என்பதன் திரிபு. நாடான் என்பது நாடன் என்பதின் திரிபு. நாடான், சான்றோன் என்பவர் சத்திரிய மரபினர். நாயக்கருக்கு முன்னால் இவர் தமிழகத்தை ஆட்சி செய்த முடியுடை மூவேந்த மரபினர். நாயக்கர் மதுரையைக் கைப்பற்றிய உடன் பாண்டிய மரபினராகிய சான்றோர் குலமக்கள் பின்வாங்கி நெல்லை மாவட்டத்தின் தென் பகுதியில் குடியேறினர். நாயக்கருடன் போரில் தோற்றதன் காரணமாய் பாண்டிய மரபினராகிய சான்றோர் அடக்கி ஒடுக்கப்பட்டு, காலப் போக்கில் தாழ்த்தப்பட்டேர் நிலையை அடைந்தனர். (இராமலிங்க குருக்கள். W.A. குமரய்யர் நாடார் - நாடார் மக்களும் நாயக்க மன்னரும். )

14) பேராசிரியர், இலங்குளம் குஞ்சன் பிள்ளை கூறுவதாவது: சேர மன்னர்கள் செருமாராயிருக்கலாம் என்பது கே.பி. பத்மனாபமேனன் கருத்து. பி.தி. சீனிவாசய்யங்கார் அவர்கள் குறவர் என்கிறார். அவர் வில்லவராக (நாடாராக) இருக்கலாம் என்று நான் கூறியிருக்கின்றேன். கொடகுபகுதியில் பதனீர் இறக்கும் தொழில் செய்யும் நாடார் சாதியினரை வில்லவர் என்று இப்போதும் அழைக்கின்றனர். சேர மன்னரிடம் காவிதிகளாக இருந்தவர் நாடார்களின் நாவிதர்களாயிருப்பதும், வில்லவர், சான்றோன் முதலிய வழக்குகளும், சின்னம் பனம் பூவாயிருந்ததுவும் என் கருத்துக்கு ஆதாரங்கள் (இலங்குளம் குஞ்சன் பிள்ளை. பண்டையக் கேரளம். பக். 197)

(தொடரும்)